• 
• 
• 
• 
• 
• 
• 
• 

ᐱᕙᓪᓕᐊᓂᖅ ᑲᒪᔨᖏᑦ ᑲᒪᒋᔭᖃᓲᑦ ᑲᑎᓯᒋᐊᖃᕐᓂᒥᒃ ᐃᓪᓗᓂᒃ ᐊᑦᑕᑐᕐᑎᓂᒃ ᐃᑉᐱᒍᓱᓕᕐᑎᒋᐊᕐᓱᑎᒋᑦ ᐱᒻᒪᕆᐅᓂᖏᓐᓂᒃ ᐊᓇᕐᕋᖏᑦᑕ ᐊᒻᒪᓗ ᓴᓂᖏᑦᑕ ᓱᒃᑯᑎᑕᐅᑦᑌᓕᒋᐊᖃᕐᓂᖏᓐᓄᑦ ᐃᓅᒍᑎᒋᒍᓐᓇᑕᖏᓐᓂᒃ ᐊᓕᐊᓇᕐᑐᒦᓪᓗᑎᒃ, ᐊᑦᑕᓇᙱᑐᒦᓪᓗᑎᒃ.

ᐃᓕᑕᕆᔭᐅᓂᕐᒥᓄᑦ ᐱᒐᓱᐊᑦᓯᐊᓂᖏᓐᓄᑦ, ᐃᓘᓐᓇᑎᒃ ᐃᓚᒌᑦ ᐊᑭᖃᙱᑐᓂᒃ ᐱᒪᓂᕐᓄᐊᖓᔪᓂᒃ ᓇᓗᓀᒃᑯᑕᕐᑖᑕᐅᓲᑦ ᐊᒻᒪᓗ ᓄᓇᒥᒃ ᓱᒃᑯᑎᕆᒍᓐᓇᖏᑦᑐᓂᒃ ᓴᓗᒻᒪᓭᒍᑎᑖᕐᓱᑎᒃ.* ᐃᓚᒌᑦ ᐊᑑᑎᑎᑦᓯᔪᑦ ᐱᐅᔪᓂᒃ ᑲᒪᑦᓯᐊᕈᓯᓂᒃ ᓇᓗᓀᕐᑕᐅᒪᔪᓂᒃ ᓇᓗᓀᒃᑯᑕᕐᓂ ᐳᓛᕆᐊᕐᑕᐅᓯᒪᓕᕐᓱᑎᒃ ᒪᕐᕈᕕᑦᑕᐅᓱᑎᒃ ᐱᕙᓪᓕᐊᓂᐅᑉ ᓇᓗᓀᕐᑕᐅᒍᑎᖏᓐᓂᒃ ᐁᑦᑐᑕᐅᓲᑦ, ᐊᕐᕌᒍᑕᒫᑦ ᓄᑕᐅᓪᓕᑕᐅᒍᓐᓇᑐᓂᒃ, ᐃᓚᖃᕐᑎᓗᒋᑦ ᑕᑯᒥᓇᕐᑐᓂᒃ ᐃᕐᕐᑫᑎᑦᓯᐅᑎᓂᒃ.

ᐱᕙᓪᓕᐊᓂᖅ ᓇᓗᓀᕐᓯᐅᑎᖏᑦᑕ ᑕᑯᒐᑦᓴᓕᐊᕆᓯᒪᔭᖏᑦ, ᐊᕐᕌᒍᑕᒫᑦ ᐊᓯᑦᔨᔭᐅᓲᑦ, ᐊᑑᑎᖃᕐᐳᑦ ᐃᓕᑕᕐᓯᔭᐅᒍᑎᐅᑦᓱᑎᒃ ᐃᓪᓗᓂᑦᓴᓯᐊᕈᑎᓂᒃ ᐊᒻᒪᓗ ᑕᑯᒥᓇᕐᑎᓯᐅᑎᖏᑦᑕ ᐊᓇᕐᕋᒥᓂᒃ ᐱᑦᓯᐊᕋᓱᐊᕐᓯᒪᓂᖏᓐᓄᑦ. ᓇᓗᓀᕐᑕᐅᓯᒪᔪᑦ ᐃᓚᒌᑦ ᐁᑦᑐᑕᐅᕙᑦᑐᑦ ᐊᒥᓱᐃᓂᒃ ᐊᕐᕌᒍᓂ ᑕᒪᑐᒪᐅᑉ ᐃᖏᕐᕋᓂᕆᓕᕐᑕᖓᓂ: ᖁᐊᕐᑐᕕᒃ 2012-ᒥ, ᐅᓗᒃ 2013-ᒥ, ᕿᐲᒃ 2014-ᒥ ᐊᒻᒪᓗ ᑐᖕᖓᓱᒌᓚᔪᕐᑕᓕᒻᒥᒃ ᑲᑕᒻᒥ ᑐᒻᒥᕋᕐᒥᒃ 2015-ᒥ. ᐃᓚᒌᑦ ᐁᑦᑐᑕᐅᓯᒪᔪᑦ ᓇᓗᓀᕐᑕᐅᒍᑎᓂᒃ 2016-ᒥ ᐁᑦᑐᑕᐅᓛᕐᒥᔪᑦ ᐱᐅᔪᒻᒪᕆᓐᓂᒃ ᒪᕐᕈᐃᓂᒃ ᑖᓗᑖᓐᓂᒃ ᐊᒻᒪᓗ ᑖᓗᑕᐅᑉ ᐃᓕᒪᕕᖏᓐᓂᒃ.

ᐃᓚᐅᒻᒥᔪᑦ, ᐃᓘᓐᓇᑎᒃ ᓇᓗᓀᕐᑕᐅᔪᑦ ᐃᓚᒌᑦ ᐊᑭᓕᕐᑐᐃᓯᐊᕐᑐᑦ ᐊᑦᑕᑐᕐᓂᒧᑦ ᐃᓪᓗᓂᒃ ᐊᕐᕌᒍᓕᒫᒥ ᑐᕂᓐᓇᑐᑎᒍᑦ ᐱᑎᑕᐅᒍᓐᓇᓲᒍᒻᒥᔪᑦ ᓄᓇᓕᓐᓂ ᐊᒻᒪᓗ ᓄᓇᓕᓕᒫᓂ ᐊᖏᔪᕐᓚᓂᒃ ᓇᓚᐅᑦᓵᖃᑕᐅᒍᓐᓇᐅᑎᓂᒃ ᐊᕐᕌᒍᑕᒫᑦ ᓇᓚᐅᑦᓵᑎᑦᓯᑎᓪᓗᒋᑦ ᐱᕙᓪᓕᐊᓂᖅ-ᐃᓪᓗᓕᕆᔨᒃᑯᑦ ᐊᓪᓚᕕᒻᒪᕆᖓᑕ ᐃᓪᓗᓕᕆᓂᕐᓄᑦ ᐅᓪᓗᖁᑎᖓᓂ. ᓄᓇᓕᓕᒫᓂ ᓵᓚᖃᐅᑏᑦ ᐃᓚᖃᓲᑦ ᐃᓗᐃᒃᑲᓂᒃ ᐃᓪᓘᑉ ᐱᐅᓕᓂᐊᒐᖏᓐᓂᒃ ᐊᒻᒪᓗ ᐃᓪᓘᑉ ᐃᓗᐊᓂᒃ ᐃᓕᓐᓇᑎᕆᔨᒧᑦ ᑭᒡᒐᑐᕐᑕᐅᓱᑎᒃ, $15,000-ᓂᒃ ᐊᑭᓕᑦᓴᔦᑦ ᑖᒃᑯᐊ, ᐊᕐᕌᒍᓕᒫᒥᓪᓗ ᐊᑭᖃᙱᑐᓂᒃ ᓂᕿᑖᕈᓐᓇᓯᑦᓱᑎᒃ ᐊᒻᒪᓗ ᑕᕐᕿᓂ ᐱᖓᓲᔪᕐᑐᓂ ᐃᓪᓗᒥᒃ ᐊᑭᓕᕐᑐᐃᒋᐊᖃᙱᐅᑎᒥᒃ.

*ᐊᓇᕐᕋᒥ ᓴᓗᒻᒪᓭᒍᑏᑦ ᐊᑐᕐᑕᐅᒋᐊᖃᓲᑦ ᐊᓇᕐᕋᒥ ᐊᒻᒪᓗ ᓈᒻᒪᑐᑎᒍᑦ ᐊᑐᕐᑕᐅᓯᐊᕐᓂᖃᕐᓗᑎᒃ.